جهاد ابو بيدر يكتب ، لنتحدث بصراحة !

طيب خلينا نحكي بصراحة وبدون رتوش وعلى عينك يا تاجر وسيبكم من دولة الرئيس ومن اعضاء حكومته اللي ما سمعنا صوت ثلثينهم حتى الآن واللي لهاي اللحظة بنطبق عليهم المثل الاردني "الطخ بقفقفا والعرس بناعور"بس ان شاء الله بعضهم استمتع بالحظر خارج عمان مؤخرا .. أصوات كثيرة بدأت ترتفع مطالبة بحظر شامل.. اسبوعين.. شهر..وغيرو وغيرو.. وسيبونا من الاقتصاد لانه الاقتصاد من سنة وهو قاعد بترنح ومعتمد ع المعونات والقروض.. يعني اللي فلس فلس واللي رح ينحبس رح ينحبس.. واللي فكح فكح.. واللي ما زال صامد كلها اكم شهر وما رح يتحمل.. طيب بالحظر الأول الخبز ما عرفنا نوزعه عالناس.. وعمال المياومة خبز ببيوتهم ما كان فيه.. ومنتفعي المعونة الوطنية يا دوب لحقهم مية ولا مية وخمسين دينار بالكثير.. والمشتركين بالضمان يا ويلي عليهم كمان نصهم كان يشكي وايامها يا دوب وصل عدد الحالات عنا ٤٠ حالة بيوم واحد.. اليوم بنعد بالالاف.. والطاقم الطبي الجيش الابيض كان شغال براحته وما كان منهك ولا حدا منه مصاب.. واليوم نسمع بوفيات واصابات بالمئات.. بطل حدا يتبرع لصندوق همة وطن.. والمرشحين للانتخابات مش فارق معهم صحة ناخبينهم والناس نفسها مش سائلة.. زمان ومش زمان كثير كنا لما نسمع سعد جابر يحكي عشرين حالة يصيبنا حالة اكتئاب ونركض نتخبى تحت الحرام.. واليوم الإصابات تجاوزت الالاف والواحد فينا نازل بوس بنص اللي بشوفهم وبحكي حتى لو كورونا هاتلك بوسة "لا كمامات ولا معقمات وبالحواري الشباب بيوم الحظر الشامل بتلعب كرة قدم.. الأمهات بحلن الواجبات لولادهن وبحكيلك التعليم عن بعد نجح.. كل يوم وزارة بتسكر يومين ومؤسسة بتسكر اسبوع والحالات بتزداد والاصابات تفتك بالعباد.. الاعلام بيتسابق على المتخصصين عشان تصريح اكشن او مثير يكون ترند على الفيس وتويتر.. وللاسف فيه شباب بقدموا مبادرات وحلول ولا حد سائل فيهم ولا حدا حتى بشارك اقتراحاتهم او عالاقل يفكر فيها.. بدكو حظر شامل اسبوعين او حتى يومين.. عندكم القدرة توزعوا الخبز بدون مظاهرات.. عندكم القدرة تتفقدوا عمال المياومة والاسر الفقيرة والغلابى ولو بشوية بقوليات ومقويات عندكم قدرة تجبروا البنوك تأجل الأقساط بدون فوائد اضافية .. عندكم قدرة تجبروا المستشفيات الخاصة تفتح غرفها بدون ما يدفعوا الناس الالافات.. عندكم قدرة تجبروا المرشحين بدل ما رموا بالشوارع مصاري بالهبل انهم يخدموا وطنهم بشوية تجهيزات.. عندكم قدرة تعملوا نظام حقيقي عشان الناس تشتري الضروري من حاجاتها بدون تجمعات.. قبل ما تطالبوا بحظر شامل فكرو وسيبونا من نظام الفزعات